Nóg framundan á Listasumri
Sýning Bjargar Eiríksdóttur í Ráðhúsinu á Akureyri lýkur fimmtudaginn 2. júlí kl. 17-18 með leiðsögn og listamannaspjalli. Björg mun þá taka á móti gestum og gangandi og fræða um tilurð sýningarinnar og einstök verk. Sýningin er á fjórðu hæð Ráðhússins. Að þessu sinni sýnir hún textílverk unnin með aðferðum líkt og í lagskiptu málverki. Verkin á sýningunni eiga meðal annars uppruna sinn í vinkonuspjalli, óvæntri uppgötvun, fornum útsaumi, fánum sem héngu yfir Listagili, stjörnum prýddum himinbláma kirkjulofta, lithimnu augans,Yoko Ono og dýrindis mat. Björg lauk B.Ed. prófi frá Kennaraháskóla Íslands 1991 og myndlistarnámi frá Myndlistaskólanum á Akureyri 2003 og hefur starfað við myndlist síðan samhliða kennslu við listnámsbraut Verkmenntaskólans á Akureyri. Hún hefur haldið sjö einkasýningar og tekið þátt í fjölda samsýninga. Viðfangsefni hennar er manneskjan, líkami hennar og innra líf og fela verkin oftast í sér langan tíma. Olíumálverk, þrykk og útsaumur eru þeir miðlar sem hún hefur mest notað en einnig teikning, ljósmyndir og vídeó eða það sem henni finnst hæfa hugmyndinni hverju sinni.
Í kvöld, þriðjudagskvöld, 30. júní kl 20.30 mun Anna Jónsdóttir bjóða gestum að heyra úrval íslenskra þjóðlaga sungina cappella í Verksmiðjunni á Hjalteyri. Anna er einnig vön að segja svolítið frá lögunum, persónulegum tengingum eða uppruna laganna, sögum og öðru áhugaverðu. Enginn aðgangseyrir en tekið verður á móti frjálsum framlögum.
Anna mun nú í sumar leggja land undir fót og halda tónleika víðs vegar um Ísland. Tónleikaferðina nefnir húnUppi og niðri og þar í miðju, en hún er farin í kjölfar útgáfu hljómdisksins VAR sem hefur að geyma íslensk þjóðlög, hljóðrituð í Akranesvita og í lýsistanki í Djúpavík. Lögin á eru sungin án meðleiks að undanskildum tveimur lögum þar sem Svavar Knútur Kristinsson leikur með á harmoníum.
Á föstudaginn 3. júlí verður einnig opnun á sýningunni Nowhere else/Hvergi annarsstaðar kl 17 og er opið alla daga nema mánudaga til og með 26 júlí. Opnunin stendur til kl. 21:00 um kvöldið.
Sýningarstjóri sýningarinnar er Sirra Sigrúnar Sigurðardóttir, en í sýningunni taka þátt 8 alþjóðlegir listamenn og 1 líffræðingur. Titill sýningarinnar er vísan til einnar áhrifamestu myndar mannkynssögunnar “The Pale blue dot”, fölblár punktur sem var tekin fyrir 25 árum (1990) af geimkönnunarfarinu Voyager 1. Þegar könnunarfarið var um það bil að yfirgefa sólkerfi okkar var myndavélum Voyager snúið aftur í átt til jarðar og myndin tekin úr 6 billjón kílómetra fjarlægð. Jörðin birtist aðeins sem örsmátt rykkorn svífandi í sólargeisla umkringt myrkri útgeimsins. Í kjölfar myndbirtingarinnar skrifaði stjarnfræðingurinn Carl Sagan einn áhrifamestatexta síðustu aldar, þar sem hann nær á kristaltæran hátt að draga fram hrollkaldan sannleikann sem myndin birtir okkur. Það er enginn annar staður, hvergi annarsstaðar en á þessum litla punkti sem við getum lifað – þarna er öll tilvera mannkyns frá upphafi til enda.
Listafólkið ávarpar með verkum sínum hugmyndina um okkur og mennskuna í óravíddum alheimsins jafnt í tíma og rúmi. Hér þjónar “Pale blue dot” – ljósmyndin hlutverki einhverskonar upphafspunkts.
Í Listasafninu, Ketilhúsi stendur yfir listverkefnið RÓT. Hvað gerist þegar hópur skapandi einstaklinga kemur saman til að vinna að sameiginlegri hugmynd? Ómögulegt er að sjá það fyrir, en niðurstaðan verður áhugaverð. RÓT varð til einn vetrardag á sameiginlegri vinnustofu þriggja listamanna; Freyju Reynisdóttur, Karólínu Baldvinsdóttur og Jónínu Bjargar Helgadóttur. Þær langaði að nýta margföldunaráhrifin sem gott samstarf framkallar. Listamenn úr ólíkum listgreinum sameinast í gerð verka sem eru þróuð á staðnum með ólíkum áherslum. Verkin eru unnin samdægurs og sýnd. Hver dagur hefst á hugflæði þar sem allar hugmyndir eru viðraðar þangað til rótin, sem allir geta unnið út frá, er fundin. Sýningin þróast og breytist því fyrstu tvær vikur verkefnisins þar sem verk eru unnin annan hvern dag og í aðrar tvær vikur verða þau til sýnis. Allt ferlið er opið gestum og gangandi. Velkomin. Vinnudagar sýningarinnar eru þriðjudagurinn 30. júní, fimmtudagurinn 2. júlí og laugardagurinn 4. júlí. Að þeim dögum loknum verður sýningin opin þriðjudaga – sunnudaga kl. 10-17. RÓT stendur til 19. júlí.
Á Græna hattinum munu Ljótu hálfvitarnir taka lagið og svo minnum við á að hægt er að skrá viðburði til loka Listasumars á netfangið gunnathors@listak.is