Borgarbókasafnið – Menningarhús Gerðubergi
Handverkskaffi
Miðvikudagskvöldið 4. nóvember 2015 kl. 20-22
Rússneskt hekl
Aðgangur ókeypis – allir velkomnir!
Miðvikudagskvöldið 4.nóvember kl. 20-22 verður heklað að rússneskum sið, en þá heimsækir Patrick Hassel-Zein Menningarhúsið í Gerðubergi og sýnir áhugasömum grunnaðferðirnar í rússnesku hekli. Hann mun einnig sýna valda hluti af sinni hönnun í rússnesku hekli. Gott er að taka með heklunál nr. 5 og garn sem hentar, eins og til dæmis kambgarn.
Patrick Hassel-Zein er sérfræðingur í aðferð sem nefnist rússneskt hekl og hefur gefið út tvær bækur á íslensku um heklið. Hann hefur hannað ýmis spennandi munstur á sjöl, peysur, sokka, húfur og allt milli himins og jarðar. Það má nefna munstur með sléttum og brugðnum lykkjum, litamunstur, gatamunstur, kaðlamunstur og fleira. Patrick hefur jafnframt haldið ótal námskeið á Íslandi og erlendis og verið tilnefndur til verðlauna fyrir sína hönnun. Hann hannar föt á bæði börn og fullorðna en innblásturinn sækir hann í íslenska prjónahefð og einnig vísindaskáldsögur
Handverkskaffi hefur verið á dagskrá í Gerðubergi fyrsta miðvikudagskvöld hvers mánaðar síðan haustið 2008. Markmiðið með þessum kvöldum er að bjóða upp á notalega kvöldstund þar sem gestir geta kynnst spennandi handverki. Boðið er upp á stuttar skemmtilegar kynningar og stundum sýnikennslu, allt eftir viðfangsefni kvöldsins.
Það er alltaf eitthvað um að vera í Gerðubergi á miðvikudagskvöldum. Dagskráin á þessu misseri skiptist í Handverkskaffi, Sagnakaffi, Heimspekikaffi og Leikhúskaffi.
The post Handverkskaffi í Menningarhúsi Gerðubergi | Rússneskt hekl | appeared first on sím.